Hoazetmohl bann Brugger

In Allerheiligntog sein miers letztamol ferkindet (Heiratsaufgebot in der Kirche) wordn. Selm ist just Montag gewödn. In Dienst-tog ist Allerseelentag gewödn. Hot sis not gschükt, Hochzeit sa holtn. In Mitig (Mittwoch) a nöu not. Selm ist Jubiläfosttog gewödn, as hot sellm der Popst a Ju-bile auser göbn. Nocher ist inser Hoazet holt in Pfinztig, (Donnerstag) 4. November, gewödn. Jo, jetzt hobn mit holt Hoatzet. As ist gonz kloan hear gongen, ower decht sein a por groaßa Häupter gewödn. As ist der Ferwolter, Herr Sigmund von Lasser, und der Herr Sekreter von Hall, der just sellm a por Wochn do in Berg-und Hittnamt in Klausn war, nocher der Herr Kontrolor Josef Pfund, der ist gor bei mier als Zeug gewödn nocher der

Schmölz-Huatmann, der ist ban Seppl Zeug gewödn und der Fel-thurner Pf orrer, ollso in gonzn inser 6 sögß Leut gewödn. I binn ah röcht a lötzes Gitschele (Mädchen) gewödn, a verzogs^

Sa Morget in aller Früe ist der Huatmann Klausn gongen san Niederwieser und hot in Knöcht gemocht a Roß inna Gutscha in-sponnen. Nocher sein sa ummen gforn afn Bergamt und in Herrn Kontrolor J. Pfund obgeholt. Nocher sein sa hear kemmen san Bök und hobn mi obgeholt. Nocher sein mier auser geforn san Brugger. Nocher hot mi die Brugger-barba erst nöu schien herkrichtet. Nocher ist der Seppl ah gschikt gewödn. Nocher sein mier 4, der Pfund und der Huatmann und der Seppl und i, nach Felthurns gongen. Um 10 Ur sein mit kubaliert (kopuliert) und feuerliches Ammt gehaltn wordn. Die Mann-der sein in Uniform gewödn, der Seppl ah ols Bräutigam. Der Pfund hot in Sabl getrogn.

Nocher bold förtig gewödn ist, sein mier wieder sann Brugger oar, und der Pforrer mit ins. Nocher sein die Herrn kemmen, der Ferwolter v. Lasser, und der Sekreter. S Hoazetmohl hobn mier bann Brugger kot. Der Seppl ist do in Quatier gewödn schun 8 Johr. Gekocht hot die Brugger Muater, und die Huatmonnin, in Seppl sein Schwöster. Nocher af der Nocht sein die Schmölzer und ötliche Knoppn, dö just af einige Zeit do in der Schmölze warn, kemmen. Dö hobn nocher anieder a Stükl Bratl und a Holbe Wein krieg. Gewödn isch röcht unterhaltlich. Die Muater ist a um droi Nomitog kemmen.

Der Brugger Voter hot a Freude kot, die Herrn rauschig sa machn, und hot ihnen ollerhond Gotung Wein za kostn göbn, und dös gibt Rausch. As ist Hörbst und der noi-je Wein gewödn. Der Pfund ist gscheider gewödn. Er hots ver-standn, as dös nött guat geat und hot not viel trunkn. Ober die joan Herrn hobn krot a wie getrunkn. Der Bruggervoter hot olleweil gsog: „Jetz, meine Herrn, kostn s amol den, wie ihnen der schmökt!" Der Wein ist selm guat gewödn. Nocher bolds förtig ist gewödn, nocher hot der Niederwieser Knöcht dö Herrn gemiet Klausn innen füern mit der Gutscha, wie er zu Morget ins hot auser gfiert. Nocher hobn die Herrn, der oana ban oan Fönster von der Gutscha, der oana ban ondern Fönster ausn gspübm. Der Herr Pfund hot hoamlich glocht.

Allso, jetzt ist die Hoazet verbei, und a söu binn i sann Heiratn kemmen. Ober jetzt honn i an liebn Monn kot. Die Muater hot in Seppl gearn kot und der Seppl die Muater ah. Der Seppl hot gsog: „Jetzt honn ia ah wieder a Muater. I honns a gearn." Seine Altern sein schon lang gestorbn. Die Muater hot dernach öfter gsog: „I honn in Seppl röcht gearn. Er ist ollm söu freundlich und fein. Moidl, du host an guatn Monn. Du konnst zaf rüedn sein." — „Ja Muater, seil bin i ah", honn i gsog.

Ower die Kreuz und Wiederwertigkeiten und Verdrießlichkeiten sein ins ah not asn Wog gongen. Seil sein ins begegnt ge-nua. Ober von den derzöhl i net. Das Bösta ist nur gewödn, as mier uns einonder tröstn hobn können. Bold ist mier s Herz za schwahr gewödn, nocher hot er mich getröstet und augeholfn. Oft honn i ihm gemiet helfn.

Ober von gonz örgstn muaß i decht a bisl an Erwenung mochn. Mir hobn nocher s Teiserhäusl ge-kaft, und koan Knopf Geld kot. Nor hot mir die Muater ihr gonzes Vermögn gliedn. Es wahren aber nur 300 Gulden gewödn. Ober as wahr schun gongen. Mir hobn ge-orweitet und gschundn. Der Seppl hot müßn 12 Stund af der Schicht sein und wahr der hoama wieder orwatn. Schlofn hot er f reulich nie mehr können as 4 Stund. Ober as ist decht fein gewödn. Mir hobn a Kua kot. Nor hobm mier a Schmolz und Milch kot. Und röcht fein ists gewödn, sammt der hortn Orbat. Inser Töchterle, s Moidele, ist sellm 6 Johr alt gewödn. Ist ah inser Freude gewödn. Ober nocher ist a Unglük gschöhdn, für ins und für die Schmölzer und für die Knoppn olla.

Jetzt ist der Herr Kontrolor J. Pfund gstorm. Nocher ist der Verwalter S. V. Lasser fort kemmen. Der neue Bergroth Sch. ist ein wo-haftiger Arbeiter Feunt und nicht

Freund gewödn. Er hot long dahin gearbeitet mit Lust und Lugn, bis ers derichtet hot bei die Wiener Bergminister. In Pfunderer Berg ist nicht mer zu machn, do soll nicht mer georweitet werden, da gibs kein nutzes Arz mer, die Schmölzhitte die soll aufglossn werdn, die Knoppn und Schmölzer müßn alle in Schneeberg gien, in Schneeberg ist viel schöneres Arz, sogt er. Jetzt hobn ober just do inzere Knoppn a wunder-schiens Arz, eine neue Arzoder, gf undn und hobns ihm mit Freude gezoag und gemoant, er soll jetz von sein Blan olassn. Ober noa, er ist zornig wordn und hot gschwind befohln, den Ort mit Schöuder zue zumochn, as mann nicht mer sigt, und stillschweign gebotn. Olla Knoppn und Schmölzer hobn in Schneeberg ausn gemiet in Summer, und Winter in Pflearsch, ist ah a Bergwerk.

Aus KREUZTRAGEN. DREI FRAUENLEBEN. Herausgegeben von Michael Mitterauer. Verlag Böhlau, Wien 1984. 136 Seiten, öS 180,-.